Mulleres e Inspiración é unha iniciativa da Orquestra Sinfónica Cidade de Pontevedra co apoio do Concello de Pontevedra, a partir do proxecto de Judith Iglesias. O ciclo de actividades busca visibilizar a presenza das mulleres no eido da composición musical, neste caso na da música clásica.
Os elementos que creamos para Mulleres e Inspiración son:
- Cartel.
- Programa de man, coa información do concerto principal e as temáticas das conferencias previas a este concerto. Formato: tríptico pregado en envolvente.
- Exposición de exterior: deseño da mostra Mulleres na música con información relevante sobre as principais compositoras da historia da música galega.
A mostra
O deseño en paneis de 2 x 2 metros reproduce, de maneira cronolóxica, as biografías de destacadas mulleres compositoras da historia en Galicia. Compúxose sobre 3 cubos de 2 x 2 metros, montados cos paneis fabricados en Dibon (un material resistente e axeitado para o exterior) rotulado con vinilo impreso.
Todas as pezas, así como as súas adaptacións dixitais, seguen unha liña gráfica limpa e identificable, coa gama dos azuis como cores predominantes. Con estas cores búscase recordar as cores da bandeira galega de maneira estilizada e estética, menos evidente, xa que o contido da exposición non debería estar eclipsado polo deseño da mesma.
A exposición Mulleres na música exhibíuse desde o 1 de xuño ata o 15 de xullo de 2022 no espazo exterior do Pazo da Cultura de Pontevedra, e durante o mes de marzo de 2023 no paseo de Odriozola, no centro histórico pontevedrés.